إعلان علوي

الدكتور ماهر العباسي : أكبر كذبة صارت في تونس هي كذبة وصلنا لصفر حالة

 

نشر الدكتور ماهر العباسي تدوينة على حسابه على الفايسبوك يتحدث فيها عن الوضع الوبائي في تونس وهذا ما جاء فيها : 
أكبر كذبة صارت في تونس بعد كذبة بلغ شعبنا درجة من الوعي هي كذبة وصلنا لصفر حالة 
تنجمو تعملو بحث في جميع المواقع باش تكتشفو أنو بخلاف نيوزلندا الي هي جزيرة نائية في المحيط الهادي مافمة حتى بلاد في العالم تجرأت وقالت وصلنا لصفر حالة . 

أي إنسان عندو شوية مخ وشوية لوجيك يعرف أنو فيروس كيما الكورونا مستحيل توصل لصفر حالة الا ما 90% من السكان يعملو مناعة بالتلقيح والا بالمرض . خاطر راو حكاية 60-70% مناعة هي فقط باش توقف تفشي الوباء أما يقعدو حالات متفرقة . 
باش توصل لصفر حالة يلزمك توصل تحصر جميع الحالات وهي حاجة تقريبا مستحيلة أما باش تحلم انك تعملها يلزمك تعمل ملايين التحاليل خاطر المرض هذا في أغلب الحالات مايعطيش أعراض ورغم هذا يعدي . 
الدليل القاطع على صحة كلامي هي الدراسة الي تعملت في أحياء من العاصمة في اخر أفريل والي أثبتت أنو تقريبا 10% من السكان تعداو بالفيروس في وقت الي الإحصائيات الرسمية وقتها تحكي على أقل من ألف حالة في كامل الجمهورية . إي عشرات الآلاف الي تعداو في العاصمة شكون عداهم ؟ الملايكة ؟ ... وعشرات الآلاف هذومة شكون عداو ؟ والي عداوهم شكون عداو ؟ الجواب واضح وجلي ... الفيروس هرب علينا وتفشى ومافقناش بيه وماعملش حالات خطيرة خاطر في ماي وجوان وجويلية واوت شراستو كانت ضعيفة والدليل انو كي ولينا نعملو آلاف التحاليل في الصيف فقنا بآلاف الحالات .... حكاية الصفر حالة حكاوهالنا وهوما يعملو في 100 و 200 تحليل في النهار لأقارب الحالات الي فاقو بيهم والي عزلوهم يعني عادي بعد مدة تلقى صفر ... في حين انو الفيروس سارح على روحو في مناطق أخرى وموش يعطي في أعراض . 
ولهذا كفانا إستغباء للعباد راكم غلبتو علينا .

ليست هناك تعليقات